फेरा - मराठी भयकथा - MARATHI HORROR STORY
 |
| MARATHI BHAYKATHA |
लेखक : योगेश वसंत बोरसे .
दिवसभर काम करून थकलेलं शरीर . परत सायकलवर १५ ते २० किलोमीटर जायचं म्हणजे ,काय होणार हे वेगळं सांगायचची गरज नाही . पायांचा पाठीचा पार भुगा व्हायचा . गावच्या बाजाराला जायचं म्हणजे एवढं अंतर कापावच लागायचं . कधी काही वाटायचं नाही ,कधी कधी रात्र होऊन जायची .
तसं आमचं गांव आडबाजुचं , शहरासारखे मोठं मोठे रस्ते नाहीत कि रस्त्याने लाईट हा प्रकार नाही . आजूबाजूच्या गावांना जायचं तर कच्चे रस्ते . काही ठिकाणी रस्ते होते ते हि सिंगल रोड , खड्डे पडलेले खराब झालेले . म्हणजे प्रवास आदळत आपटतच व्हायचा .
असाच एक दिवस रात्री येत होतो . रस्त्याने चिटपाखरू नाही . सभोवताली शेती आणि झाडी . हवा पण थोडीशीच . पानांची सळसळ होईल एवढीच . सगळीकडे चिडीचूप शांतता . मी माझ्या धुंदीत पायडल मारत निघालो होतो . चैन उतरली ,तसा मीही खाली उतरलो . अंधारात सवयीनेच चैन बसवली . पाच दहा मिनिटांनी पुन्हा उतरली .
मनात आलं ,पायीच जावं . उद्या बघता येईल . म्हणून पायीच निघालो . तोंडात गाणं आलं ,.... ... एक इन्सान हूं ,मै तुम्हारी तरह ..... मी विचारात पडलो ,असं गाणं यावेळी का सुचावं ?माझं मलाच नवल वाटलं . जाणीवपूर्वक तोंड बंद केलं व दुसरं गाणं आठवायला लागलो . मागून आलेल्या आवाजाने दचकलो .
"ए बाबा !" मागे वळून बघितलं ,"कुठं चाललास ? "
नऊवारी साडी नेसलेली जवळजवळ ४५ ते ५० वयाची बाई असेल , डोक्यावर बाचकं , व हातात काहीतरी .... नाही लहान मूल होतं , ६ते ७ वर्षाचं असेल . मी विचार केला ,हि मागून अचानक कशी आली ? आपलं लक्षही नाही . जाऊ द्या .
मी विचारलं ," मावशी एवढ्या रात्री कुठं निघालात ? सोबत कुणी नाही ?"
" आरं बाबा , लेकींकडं गेलते ! लेक वारली ! हे पोरगं एकटं पडलं ! बाप पहिलेच मेला याचा . तो बायकोला बी घेऊन गेला ! "
" आता हे एवढंसं लेकरू कुणाच्या भरवशावर सोडायचं ?म्हणून सोबत आणलं !"
" पण तुम्हाला गावात कधी पाहिलं नाही ?"
"कसं पाहशील ? पहिलाच टाइम हाये या गावाला यायचा ! सकाळ पर्यंत गावात पोहोचू . बहीण हाय एक लांबची . दिवसभर थांबील अन संध्याकाळी , नाहीतर रातच्याला परत निघून जाईल . "
मी विचारात पडलो , ' सकाळपर्यंत गावात पोहोचू ,म्हणजे काय ? मी तर रोज जातो ! थोडा उशीर होतो ,पण तास दोन तास ! जाऊ दे .'
"पायीच निघालास व्हयं ?"
मी दचकलो . भानावर आलो . "हो ! चैन सारखी उतरती ! म्हटलं जावं पायीच ! पाया खालचा रास्ता हाए . थोडा उशीर होईल ,एवढंच. "
" फिरायची लय हौस दिसते. रात्रीचं असं फिरू नये. येळकाळ सांगून येत नाही. "
" म्हणजे ? " आरं बाबा रात्रीचा वक्त खराब असतो. कोण कसं कोण कसं ? काई कमी जास्त झालं, मग माणूस गुंतून जातुया, फेरा पडतुया. "
" म्हणजे ? "
" आरं म्हंजे काय लेका ! तू बी पक्का येडाच हायेस. जाऊ दे. "
" मावशे ते बाचकं सायकल वर मागे ठेव, अन पोराला बसावं पुढं ! "
मावशीने पोराला विचारलं " कां रं पोरा बसतू का ? " पोरगं बोललं नाही. नुसतं माझ्याकडे पाहिलं व मान हलवली. तसं मी त्याला उचलायला गेलो.
नाई म्हणलं , मी बसतो !
अनं कधी बसलं मलाही कळलं नाही !
मला काहीतरी विचित्र वाटायला लागलं. पण नेमकं काय, कळत नव्हतं. मावशीने बाचकं मागे ठेवलं होतं. पण सायकल एकदम जड झाली होती. समजं ना ? कशाने जड झाली ? एवढंसं पोरगं आणि एक बाचकं ! सायकल लोटून घामेघूम झालो , पार थकलो. पण गाव काही जवळ येईना.
मावशीचा आवाज आला. " का रं बाबा थकलास ? अजून तर लई लांब जायचं हाय ! "
" मावशी एक विचारू का ? बाचक्यात काय हाय ? "
तशी मावशी चिडली व जोरात ओरडली,
" तुझा मुडदा हाय बाचक्यात, पाहून घे ! अरं लेका काय असणार ? दोन - चार कापडं , अन शिदोरी हाय . लहान पोरगं हाय म्हणून लागतं सोबत.
तुला जड होत असंल तर मी बाचकं उचलून घेतीया. पण मावशीने काही उचललं नाही व मी ही काही बोललो नाही. थोडया वेळाने पोराने आवाज दिला.
" आजे... भूक लागलीय. काही खायला हाय का ? "
" ए थांब की , पोराला भूक लागलीया, उपाशी हाय, दोन घास खाऊ दे की. "
" पण इथं कुठं बसणार ? लाईट न्हाई, उजेड न्हाई. "
" त्याला काय हुतंय ? बसू की झाडाखाली ! आम्हाला सवय हाय !"
" बरं मंग , तुमी आरामात बसा मी जातो. घरी वाट बघत असतील. "
" अरं तुला काही लाजबीज ! बाईमाणसाला, पोराला एकटं सोडून कुठे जातुया ? थांब की जरा. "
मला संशय आला , हे काहीतरी वेगळंच हाय इथून निघावं. ते झाडाखाली जाऊन बसले. तसा मी हळूच सायकल कडे सरकलो. चैन कशीतरी लावली व जोरात पायडल मारून जीव खाऊन पळालो. मागून पोराचा आवाज आला,
" आजे, ते पळून गेलं ! " मावशीचा आवाज आला ,
" जाऊ दे कुठं जाईल. ईल परत. "
माझ्या जीवाचं पाणी पाणी झालं. पाच - दहा मिनिट झाली. आता आपल्या जीवाला काही धोका नाही असं वाटलं म्हणून उतरलो. म्हटलं जरा मोकळं व्हावं म्हणून थांबलो. काम उरकलं, म्हटलं निघू. तितक्यात आवाज आला ,
" ओ भाऊ ! " एक बाई होती. तिशीतली असंल.
" माझं पोरगं सापडेना, तू पाहिलं का कुठं ? "
' च्या मारी ! आता ही कोण म्हणायची. अनं रात्री कुठं फिरतीया ? '
"अरं भाऊ माझं पोरगं सापडना. लहान लेकरू हाय. कुठं हाय काय मालूम ? "
अनं रडायला लागली. तिचं रडणं चालूच. तिचं रडणं ऐकून जीव घाबरायला लागला. तसा सायकल घेऊन पळाया लागलो. बसायचं बी भान नाही ! रडणं चालूच !
बराच येळ पळालो . नंतर थांबलो.
' आज काही खरं नाय ! काय चाललंय आज ? गाव पण येईना रस्ता पण संपेना ? एवढा येळ का लागतोय ?'
समोर एका झाडाखाली कुणीतरी बिडी का काहीतरी पीत होतं. मी तिकडून जायला निघालो. तसा त्याने आवाज दिला,
" ओ दादा ! " मी लक्ष दिलं नाही.
" ओ दादा.... काय हे , एकटं कुठं चालला ? "
" कुठं म्हंजी ? घरी. "
" घरी जाल हो एवढी घाई काय हाय ? बसा वाईच ! "
" नाय लई उशीर झालाय घरचं वाट पाहात असतील. "
" उशीर झालाय ! आओ बसा की. बरं जा. " मी निघालो.
" ओ दादा मी काय म्हणतो माझी बायको अनं पोरगं कुठं गावना ? तुम्ही पाहिलं का कुठं ? "
" म्हंजी "
" आओ म्हंजी काय ? माझं छोटं पोरगं अनं बायको कुठं गांवनां ? तुम्ही पाहिली का ? "
" हो ! "
" काय ? "
" एक छोटं पोरगं पाहिलं पण त्याच्याबरोबर एक वयस्कर मावशी होती. "
" कुठं पाहिली ? "
" ती झाडाखाली जेवण करतायेत अनं पुढे आलो तर एक बाई भेटली ती पोरासाठी रडत होती ! "
" च्या मारी या थेरडीच्या ! ..... माझी बायको मारली, मला मारलं आता माझ्या पोराला मारते व्हय ! इला जित्ता सोडणार न्हाय आज !"
अनं तो सुसाट पळाला. दिसेनासा झाला. मला समजेना.
' हा असा काय बोलला ? अनं गेला कुठे पळत पळत ? आणि मी नकळत त्याच्यामागे ओढला गेलो .......... त्याच्या मागावर..........................
THE END
VISIT OUR YOU TUBE CHANNEL
लेखक : योगेश वसंत बोरसे.
- ALL RIGHTS RESERVED AT YOGESH BORSE & BGSM
- ABOUT US
- PRIVACY POLICY
➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤➤
⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎⇎ ⇎⇎⇎⇎
We work for provide entertainment to all human beings . We provie - Unique Horror Stories in Hindi Marathi, Horror entertainment , Hindi bhaykatha , Suspense Stories etc. We also try to provide provide- some Unique Knowledge , Motivation , Great Thaughts, Technical Guidense, Various digital and online teqniques, moral stories for kids, and specially Horror stories video entertainment . For welfare of soceity.
ConversionConversion EmoticonEmoticon