फट्टू - भाग - ६ वा - मराठी भयकथा - HORROR STORY MARATHI STORY
 |
| MARATHI HORROR STORY |
सूचना :- ही एक काल्पनिक भय कथा असून , वाचकांच्या सोयी साठी ही दीर्घ भयकथा २० भागात विभागली आहे ! प्रत्येक भाग ,प्रत्येक प्रसंग भयचकित करणारा ,हूर हूर लावणारा ,आपल्याशी जवळीक साधणारा , गूढ गोष्टींकडे आकर्षित करणारा , आपल्या अवती भवती बघायला भाग पाडणारा आहे . वाचकांना विनंती आहे की त्यांनी पूर्ण कथेचा आनंद घ्यावा . तुम्हाला नक्कीच आवडेल !
आता पुढे :- त्या व्यक्तीने घरात प्रवेश केला . आणि तेनसिंग सारखाच अनुभव सगळ्यांना आला . प्रत्येकावरचा ताण क्षणार्धात कमी झाल्यासारखा वाटत होता . यांना असं वाटलं की जे शोधायला निघणार होतो ते घरबसल्या मिळालं . देवालाच काळजी होती यांची .
ती व्यक्ती सरळ समशेर कडे गेली . समशेर झोपला होता . तेनसिंगच्या काळजात धस्स झालं ! " एक मिनिट ! कोण आपण ? असं रात्री अपरात्री दुसऱ्याच्या घरात घुसता ! थांबा ! "
"बाळा ,मी कोण आहे ,ते महत्वाचं नाही ! आणि थांबायला वेळ नाही ! थांबलात तर अनर्थ होईल ! हे शैतानाचं पोर आहे ! " तेनसिंग संतापला . " तुमच्याकडे पाहून वाटलं की तुम्ही कुणी सिद्ध पुरुष आहात ! पण एवढ्याशा पोराला शैतानाचं पोर म्हणताय ? काहीच वाटत नाही ? तो माझा पोरगा आहे ! माझा ! "
" बाळा ,थोडा शांत हो ! हा तुझा मुलगा आहे यात शंका नाही ! पण हा शैतानाचा अंश आहे . याच्या रूपावर जाऊ नकोस . या लोभस रुपामुळेच तू याचं संरक्षण करतोयस . धृतराष्ट्र होऊ नकोस !" "नाही ! याचं संरक्षण करणं माझा धर्म आहे , माझं कर्तव्य आहे ! " "बाळा ,देवाने तुला थोडी बुद्धी दिली आहे तिचा वापर कर ! " "पण बाबा ,हे पोर शैतानाचं कसं असेल ? "
" ते तुझ्या बायकोला विचार ! " "काय ?" " हो ,नाहीतर हिला विचार ! " त्यांनी काशीबाईकडे खूण केली . तेनसिंगला हा आश्चर्याचा धक्का होता . " लग्न होऊन तीन चार वर्ष झाली ,तरी मूल होत नाही ,म्हणून यांनी काय काय केलं होतं ते आठवतं का विचार यांना ! "
सावित्री त्या सत्पुरुषाकडे रोखून बघत होती . तिच्या नजरेतील भाव बदलत होते . दिलीप आणि संजय नख शिखांत हादरले . असा प्रकार कधी कुठे पहिला नाही ! ऐकला नाही ! वातावरणातील फरक ,बदल त्या बाबाना जाणवला . त्यांनी पटकन शबनम मध्ये हात घातला . जी त्यांच्या खांद्याला लटकत होती .
"थांब ! " सावित्रीचा आवाज ! मुळात तो सावित्रीचा आवाजच नव्हता . ती फक्त माध्यम होती ." तो माझा अंश आहे ! त्याला हात लावशील तर तुम्ही सगळे मराल ! म्हातारे तुला सांगितलं होतं ! यालाही सांगितलं होतं ! तुम्ही ऐकलं नाही ! आता परिणाम भोगायला तयार राहा ! " आवाजाच्या प्रभावाने सर्वजण हतबद्ध झाले होते . अगदी बाबाही ! त्यामुळे सावित्री बाहेर पळाली तरी हे फक्त बघत राहिले !
सर्वात पहिले दिलीप भानावर आला ." वहिनी ! " त्याच्या आवाजाने तेनसिंग ,संजय ,बाबा व काशीबाई सर्व जण भानावर आले . तेनसिंग सावित्रीच्या मागे पळाला ! पण अघटित घडलं होतं ! काही क्षणांचा फरक झाला पण तेवढ्यात सावित्री हातातून गेली होती . तिघं बाहेर पळाले . तेनसिंग चारी बाजूला सैरावैरा धावत होता . आवाज देत होता . पण व्यर्थ !
तेनसिंग प्रचंड घाबरला ! आणि चिडलाही ! हा सगळा गोंधळ त्या बाबामुळे झाला . नाहीतर सावित्री घराबाहेर गेली नसती . तो रागाच्या भरात घरात आला . दिलीप आणि संजयला अंदाज आला असावा .तेनसिंग तेनसिंग करत ते त्याच्या मागे आले .
तेनसिंग सरळ बाबाजवळ जाऊन उभा राहिला . " माझी सावित्री कुठे आहे सांग ! " " बाळा शांत हो ! तिला काहीही होणार नाही ! ती काय आणि तो काय ,तुला फक्त घाबरवत आहेत . " " सावित्री कुठे आहे सांग !" तेनसिंग ऐकण्याच्या मनस्थितीत नव्हता . " हे बघ ,शांत हो ! " बाबाने शबनम मध्ये हात घातला . आणि अंगारा बाहेर काढून तेनसिंगच्या दिशेने फुंकला . तो तेनसिंगच्या डोळ्यात गेला . तो डोळे चोळ्त मागे सरकला .
" बाबा ,काय फेकलं ? " " पोरा ,माफ कर मला ! या मुलाला घेऊन जाणं गरजेचं आहे . नाहीतर अनर्थ होईल . हा साक्षात काळ आहे ! याच्या रूपावर जाऊ नकोस ! " बाबा समशेरच्या दिशेने सरकले . समशेर त्याच्या कडे एकटक बघत होता . त्याच्या चेहेऱ्यावरील भाव बदलले . तिथे तुच्छतेचे भाव आले, " मला माझ्याच जागेवरून घालवणार ? एवढी तुझी हिंमत ! बाबाने त्याला उचलायचा प्रयत्न केला. पण तो जागचा हालला ही नाही. त्याने एक लाथ मारली. बाबा दूर जाऊन पडले .
काशीबाई रडण्यापलीकडे आणि बघण्यापलीकडे काही करू शकत नव्हती . कुठून बुद्धी झाली आणि काशी केली ,असं तिला झालं . यापेक्षा मूलबाळ नसतं झालं तरी चाललं असतं . पण पोरगी डोळ्यासमोर तर राहिली असती ! त्या नुसत्या थरथरत होत्या . डोकं बधिर झालं होतं काही सुचत नव्हतं .
"तू या कुटुंबाला संकटात पाडलंस ! आता कसं बाहेर काढशील यांना ? या शैताना पुढे माझी मात्रा चालत नाही ,तर तू आणि हे काय कराल ? " बाबानी तेनसिंगसमोर हात जोडले ,"पोरा ,काहीही कर ,पण या पोराला रात्र संपायच्या आत इथून बाहेर काढ ! नाहीतर सकाळपर्यंत तुम्ही संपून जाल ! तुमच्या भल्यासाठी सांगतोय ! "
तेनसिंगला काय बरोबर काय चुकीचं कळत नव्हतं . बाबांनी उठायचा प्रयत्न केला . पण त्यांना जागचं हलता ही येत नव्हतं . ते तोंडाने मंत्र पुटपुटत राहिले . समशेर कॉट वरून खाली उतरला . एकेक पाऊल टाकत बाबाच्या दिशेने गेला . सर्वजण बघत राहिले . त्यांची विचारशक्तीच कुंठित झाली होती . समशेर बाबांजवळ पोहोचला त्यांचे केस हातात धरले व फरफटत दारापर्यंत घेऊन गेला . बाबा ओरडत राहिले पण त्याने सोडलं नाही . दारापर्यंत जाताच एखाद्या बाहुलीसारखं बाहेर भिरकावलं .
सर्वजण डोळे फाडून पाहत राहिले ! आता समशेरचा मोर्चा यांच्याकडे वळाला . " तुम्ही जाता ,की असेच जाल ! यांच्यासारखे ! दिलीप व संजय ला हीच संधी होती ,इथून बाहेर पडण्याची ! त्यांना कळून चुकलं होतं की हे काही वेगळंच प्रकरण आहे . जगलो वाचलो तर तेनसिंगला मदत करता येईल ! नाहीतर इथेच समाधी व्हायची आपली !
त्यांनी एक क्षण ही वाया घालवला नाही ,बाहेर आले व इकडे तिकडे पाहू लागले . त्यांची अपेक्षा होती की बाबा आसपास असेल , पण बाबाच काय ,बाबाची सावली ही त्यांच्या हाती लागली नाही .
' कमाल आहे ! पहिले तेनसिंगची बायको गायब ! आता बाबा गायब ! हे गेले कुठे ? '
तेनसिंगला कळेना ,काय करावं ते ! सावित्रीला कुठे शोधावं ते ? "मामी ,तुम्ही दोघीनी नेमकं काय केलंय ?काय झालंय ? सांगाल का ? सावित्रीला कुठे शोधावं ? " काशीबाईला काय बोलावं कळेना सुरुवात कुठून करावी ते कळत नव्हतं .
त्या भूतकाळात हरवल्या . सावित्री आणि तेनसिंगचं लग्न होण्या अगोदरचे दिवस आठवले आणि त्यांच्या अंगावर शहारे आले .
" मामी ,काय विचारतोय ? सांगणार आहात का ? " आणि काशीबाईने सांगायला सुरुवात केली .
TO BE CONTINUED.......
WATCH MUSICAL COVER SONGS ON OUR YOU TUBE CHANNEL 'MUSICAL RAITA '
- ALL RIGHTS RESERVED AT YOGESH BORSE & BGSM
- ABOUT US
- PRIVACY POLICY
💗💗💗💗💗💗💗💗💗💗💗💗💗💗💗💗
We work for provide entertainment to all human beings . We provie - Unique Horror Stories in Hindi Marathi, Horror entertainment , Hindi bhaykatha , Suspense Stories etc. We also try to provide provide- some Unique Knowledge , Motivation , Great Thaughts, Technical Guidense, Various digital and online teqniques, moral stories for kids, and specially Horror stories video entertainment . For welfare of soceity.
ConversionConversion EmoticonEmoticon